【Viu】樂隊ONE PROMISE、洪嘉豪、雲浩影同周卓盈等今日喺荃灣做商場表演。打頭陣嘅ONE PROMISE一出場已經令全場high爆，結他手Sora仲有歲幾嘅囝囝現身撐爸爸，三位成員喺台上特登為Anton唱《明年見》，佢之後話：「每次聽都要忍住，我見到後面有人（歌迷）喊緊。」佢哋透露會為《明》重新錄音，加入Anton嘅Rap版，仲話嚟緊11或者12月會舉行音樂會。
ONE PROMISE受訪嗰陣，話好鍾意做商場騷，講到佢哋越來越多Fans，ONE PROMISE話：「真係要好多謝佢哋，知道佢哋有啲要跨兩個山、兩個海，晨早8、9點就嚟等，要好好照顧自己，唔好成日唔瞓嚟。」文廸搞笑叫Fans喺商場瞓。至於年底音樂會，ONE PROMISE話會造主題曲，仲話會力邀監製鄧建明（Joey Tang)做樂隊領班，問到Anton會唔會請女友林欣彤做表演嘉賓？佢話要問其他成員，Sora話：「佢開心我開心。」之後Anton就話：「就算唔上台，都一定要佢嚟睇。」
壓軸現身嘅洪嘉豪，訪問嗰陣自爆同MC張天賦會喺8個星期內派3首歌，仲話為咗9月嘅演唱會忙過不停：「Rundown呀、身心上都要準備，自己又有派台歌，7月、8月都有好多歌出，好彩我有做gym，所以都瞓得好好。」佢又透露為咗腹肌，下個月會開始戒口：「不過做gym唔一定要露嘅，可能拉一拉起嗰啲囉。」
