【A&M Diary】壽喜燒嘅香味，相信無人能夠抵檔！但原來壽喜燒分為關西風和關東風，你又知唔知呢？簡單嚟講，關西風係乾身壽喜燒，先落肉再落醬汁；至於關東風則相反。喜愛壽喜燒嘅A姐M佬今日就嚟到位於太子嘅八不潮聖，由踏入八不開始，已被濃郁嘅壽喜燒香味深深吸引。
北海道新鮮凡立貝刺身
餐廳鋪面雖然細小，但設計仍然落足心思，充滿日式小店嘅大和風格。食濃郁嘅壽喜燒之前，叫咗個非常清新嘅北海道新鮮凡立貝刺身，凡立貝大大粒，新鮮之餘，又夠爽口彈牙。
吉烈千層豚烏冬配日式辛辣湯
吉列千層豚絕對係八不嘅名物！薄薄嘅炸粉入邊，原來喺一層又一層嘅鹿兒島茶美豚肉薄片，所以油香味十足，一咬落去仲會爆晒汁，超正呀！日式辛辣湯加入咗蕃茄調味，所以唔算好辣，至於烏冬掛晒湯汁，非常滋味。
壽喜燒套餐
期待已久嘅壽喜燒終於上枱，呢個壽喜燒套餐包括日本A5黑毛和牛西冷同野菜拼盤。店員首先幫我哋用豚肉嘅油脂起鑊，再淋上壽喜燒汁，隨即就聞到濃郁嘅壽喜燒香味。日本A5黑毛和牛西冷嘅油脂分布平均，輕輕燒到五至七成熟左右，就可以加上蛋汁再一啖放入口，油香十足、肉味香濃，加上壽喜燒獨特嘅香味，呢一啖絕對係幸福嘅感覺。食完牛肉之後，可以叫店員加湯，變成壽喜燒火鍋，再加入野菜拼盤內嘅娃娃菜、南瓜、豆腐、金菇、粉絲、香菇、洋蔥、皇帝菜，呢一餐夠晒滿足感！
