【A&M Diary】睇日劇時，成日都好憧憬日本居酒屋果種熱鬧嘅氣氛，食下飲下好容易就會同隔離檯嘅陌生人有講有笑。今次嚟到太子同深水埗交界嘅界限街，一間用心經營嘅日式小店，山系。本舍，感受下家鄉日本居酒屋嘅感覺。老闆仲靜靜雞同我哋講，曾經試過有個客人太高興，仲請全場萬歲。唔知呢種日式驚喜，今日有無機會遇上呢？
手工櫻花蝦醬拌凍豆腐
自家製嘅手工蝦醬用上蒜頭、乾蔥、辣椒、櫻花蝦等整成，味道有啲似XO醬，但用料絕對比一般嘅XO醬更豐富，味道更加有層次。呢個手工櫻花蝦醬係餐廳嘅生招牌，鍾意嘅仲可以買番樽做手信，對XO醬有要求嘅你千祈唔好錯過啊！呢個手工櫻花蝦醬拌凍豆腐，清淡嘅豆腐加上非常惹味嘅手工櫻花蝦醬，不失為一個開胃嘅小菜！
燒五花腩
平時都好怕食肥膩嘢，特別係五花腩就更加係女士嘅敵人。嚟到山系。本舍就絕對值得一試，五花腩燒到微焦，將多餘嘅油粉迫出，所以食嘅時候一啲都唔油膩，而且入口非常軟腍，光是味道就知道是我喜歡的你啦！
和風高湯煮日本沙白蜆
沙白蜆鮮甜無沙，加上木魚大蔥作調味，令高湯嘅鮮甜更上一層樓，飲到最後一滴都唔想放過呀！
燒雞心串+鹽燒雞串+山系燒雞皮
日本居酒屋當然唔少得嘅就係串燒啦，小編今次就嗌咗雞心、雞皮同埋燒雞肉。最推介嘅就似燒雞心，爽口彈牙，絕對係一流嘅佐酒小食；雞皮就燒到脆卜卜，雞肉則充滿肉汁，每一款雞串燒都有唔同嘅口感，可以滿足晒唔同嘅要求啊！
魷魚軟骨沙律+黑松露醬薯條
酥炸魷魚鬚平時就食得多，今次試吓呢個魷魚軟骨沙律，軟骨口感爽脆配合沙律可以消除咗食完串燒嘅油膩。
山系。本舍 yama shǒuzhì
地址：太子界限街23號地下A1號舖
電話：+852 6188 8741
營業時間：星期一至四 00:00 – 22:00；星期五至日、公眾假期及公眾假期前夕 00:00 – 23:00
