【A&M Diary】Omakase（廚師發辦）喺香港大受歡迎，新鮮嘅食材由日本空運到港，讓味覺重投久違嘅日本旅行。我哋提早成個月預約，終於一嘗舍利鮨銅鑼灣總店！舍利鮨銅鑼灣總店嘅門口以木色及素色為主調，但原來內有乾坤，餐廳入面竟然設有一個日式庭園，除咗增加空間感，更讓視覺同時投入久違嘅日本旅行呢！
舍利鮨銅鑼灣總店
食Omakase（廚師發辦）最重要當然就係同廚師互動啦，舍利鮨銅鑼灣總店設有10席吧枱座位，大家可以近距離欣賞師傅嘅製作同功架！不過，由於座位唔多，加上舍利鮨銅鑼灣總店嘅口碑極佳，所以大家記住提前預約呀！
舍利鮨Omakase：茶碗蒸
一坐低之後，料理師傅就送上茶碗蒸。呢個茶碗蒸以蔬菜湯熬製，上面放有蓮子同百合，以一個淡口味帶領我哋進入更鮮更濃嘅日本美食世界，確實有心思。
舍利鮨Omakase：真鯛及深海池魚
真鯛配上以梅、清酒、木棉花等製作而成嘅煎酒啫喱，令真鯛嘅鮮味大大提升，非常清新醒胃！至於深海池魚加入豉油、芝麻同wasabi，味道香濃，同真鯛形成強烈對比！
舍利鮨Omakase：時不知鮭魚壽司
所謂時不知鮭魚係因為三文魚習性係夏秋期間返日本產卵，但有少部份三文魚會提早至春夏期間游返日本，所以呢種三文魚產量非常少，加上體內尚未有卵，味道同一般三文魚好唔一樣，油份更加豐富，非常豐盈，被譽為係三文魚中嘅極品！
舍利鮨Omakase：甜蝦壽司
甜蝦嘅份量勁多，非常彈牙，仲有膠口嘅感覺。但另外一個重點，呢度嘅壽司飯選用特製嘅赤醋飯，口感柔滑順口之餘，更能提升刺身嘅鮮味。
舍利鮨Omakase：鰆魚
魚皮經過火炙之後，逼出油分，令魚脂味更豐富，增加香味之餘，更同生嘅魚肉部份形成強烈嘅對比，食嘅時候非常有口感，增加層次。
舍利鮨Omakase：中吞拿魚腩壽司（中拖羅）
中拖羅一直都有捧場客，半肥瘦嘅中拖羅，顏色粉紅，接近入口即溶，魚油脂非常甘香，而不失口感。
舍利鮨Omakase：大吞拿魚腩壽司（大拖羅）
抗拒唔到入口即溶嘅感覺，就一定鍾意大拖羅！大拖羅比中拖羅淺色，因為脂肪比例非常高，好似雪花一樣，食嘅時候感受到魚嘅油脂天然甘香，味道濃郁！
舍利鮨Omakase：赤身醬油漬壽司
食完超肥美嘅大拖羅之後，我哋就進入吞拿魚最瘦嘅部份，亦即係赤身。雖然赤身無咩脂肪，但就能夠體驗吞拿魚肉嘅質感。廚師特意用醬油醃製，令赤身更加濃味。
舍利鮨Omakase：燒帆立貝
用脆口嘅紫菜包住大大粒嘅帆立貝，帆立貝表面燒焦，帶有微微嘅焦香味，外脆內嫩，非常滿足！
舍利鮨Omakase：松葉蟹羮
食完咁多濃味嘅嘢食之後，廚師就安排松葉蟹羮。松葉蟹羮相對淡味，但反而能夠突顯蟹嘅鮮甜味。值得一讚係呢個松葉蟹羮，分量十足，勁多絲絲蟹肉。
舍利鮨Omakase：青柳貝壽司
青柳貝是江戶前壽司不可缺少嘅貝類！青柳貝肉呈橙紅色，非常彈牙，充滿口感，肉味鮮甜香濃。
舍利鮨Omakase：昆布海膽壽司
呢個外表，完全想像唔到同海膽有任何關係！原來廚師先用昆布夾住海膽醃製，雖然外表奇奇怪怪，但食落口完全顛覆你嘅想像。當你咬開昆布嘅時候，海膽嘅鮮甜味一湧而上，超級鮮甜，勁好味呀！
舍利鮨Omakase：鯖魚壽司
鯖魚超肥美，魚脂豐富，肉味鮮甜，一啲都唔腥。
