【A&M Diary】踩單車嚟到大埔，大家明明話冇咩胃口，飲杯嘢就算，結果經過大埔牛脾氣，和風格調，加上地區嘅親民價錢，不如坐低食吓嘢，順便休息吓，再繼續行程啦。餐廳嘅面積雖大，但完全唔會有壓迫感，非常舒服，完全有旅行嘅感覺呀！
三文魚鰭
小食就叫咗三文魚鰭，外脆內軟，非常香口， 重點係唔會油淋淋，最啱就係配番杯日本啤酒再同朋友邊傾偈邊食啦！
汁煮豬軟骨飯
所有主食都配埋沙律同飲品，價錢親民，性價比高，所以我哋就一人一個餐啦！汁煮豬軟骨煮得好香好入味，軟骨部分有嚼口但完全唔會硬，肉質索晒汁，入口即化，精華所在當然係個汁啦，拎嚟送飯一流！
吉列芝士豬扒飯
吉列豬扒即叫即炸，所以好香脆，而且入面夾住芝士，食嘅時候可以拉絲之餘，令吉列豬扒增添層次呢！除咗吉列豬扒之外，旁邊嘅蛋包飯充滿蛋香，上面鋪滿鹹香十足嘅明太子醬，令味道更為豐富。估唔到飯底都有驚喜，廚師特意將日式燒汁混係白飯度，將多種味道加埋一齊，原來非常夾架！
