【A&M Diary】當諗唔到食咩嘅時候，我哋就最鍾意去food court，因為咩菜式食物選擇都有，大家想食唔同嘅嘢都無問題。好似今日咁，本身漫無目的嚟到新世紀廣場嘅食代館，行完一個圈之後，我哋突然就有一致決定，嚟到上州一頭和牛！上州一頭和牛嘅牛肉購自日本群馬縣，連唔少稀有嘅部位都有，餐廳門口甚至放有群馬縣頒發嘅木製證書，餐廳嘅質素夠晒抵食高質。
中呑拿魚壽司
呑拿魚一直都係M佬嘅最愛，上州一頭和牛嘅中呑拿魚壽司油脂豐富，接近入口即熔，非常滋味。
牛油果柚子沙律
好多人話合埋眼食牛油果，其實同食三文魚無太大分別。所以我哋就叫咗呢個牛油果柚子沙律，牛油果好香好濃，口感軟綿，加上清新開胃嘅柚子，真係好fresh好醒胃。
香煎和牛餃子
餃子外皮煎到好香脆，一咬開之後，和牛嘅肉汁就爆出嚟，好juicy呀！
澳洲M5和牛拼盤
今晚嘅重點當然就係澳洲M5和牛拼盤啦！呢個澳洲M5和牛拼盤非常豐富，有成5款澳洲M5和牛嘅唔同部位：
和牛腰脊心 – 絕對係5款肉入面同M佬掙食嘅肉類！呢個和牛腰脊心非常鮮嫩，肉質有彈性，肉味濃郁
和牛肩肉 – 牛肩肉嘅油脂分佈平均，肉質軟腍，接近入口即溶
和牛腹脅肉 – 係牛腹部同牛肋附近嘅肌肉，呢個部位通常帶有筋同油花，所以食嘅時候非常有口感，但又唔會太嚡太韌
和牛內裙肉 – 內裙肉係覆蓋牛肉外側嘅腹壁肉，口感軟嫩但又有咬口，燒過之後有埋焦香味就更加吸引
和牛頸脊 – 油花豐富細緻，但完全唔會太油膩，肉香味非常濃郁，好好味
