【A&M Diary】去港式茶餐廳叫餸食飯係唔少人嘅comfort food，大件夾抵食又有鑊氣可以話係佢嘅代名詞，絕對適合為繁忙嘅一天作總結。作為土生土長香港人，食茶餐廳最緊要就腳，行到邊就食到邊，嚟到荃灣川龍街，就去食富華餐廳啦！
富華餐廳：辣子雞煲
用上辣椒同芝麻爆炒嘅辣子雞煲，香氣迫人，雞肉肉質嫩滑，雞皮略帶微焦，味道微微辛辣，越食越惹味！而色彩繽紛嘅甜椒為雞煲加添顏色之外，亦索晒麻辣香味，加上甜椒本身嘅鮮甜，滋味又有層次。
富華餐廳：辣椒薯仔一口牛
一口牛真係茶餐廳餐牌中，最考功夫嘅一道菜喇！牛柳肉用大火鎖住肉汁，生熟度啱啱好，肉質唔嚡，加上吸收咗黑椒嘅辛香，非常惹味；薯仔口感外脆內軟，味道微甜，令整度菜更具層次，送飯一流。
