【A&M Diary】鮨燐係一間主打廚師發板嘅日式餐廳，性價比超高，鍾意食Omakase真係唔可以錯過！鮨燐嚴選自北海道、九州同沖繩嘅當季新鮮魚獲作食材，令你嘅味蕾更能享受時令食材嘅尊尚享受。另外，鮨燐午市更有不同貫數嘅套餐選擇，所以抵食得嚟又唔馬虎，啱晒我哋慶祝生日同周年紀念。
鮨燐廚師發板：日式漬物、沙律菜
鮨燐以日本簡約木系風設計，一入到餐廳非常舒服，光鮮亮麗，乾淨企理。坐低無耐，鮨燐店員就奉上日式漬物同沙律菜作為前菜，為之後嘅廚師發板揭幕。
鮨燐廚師發板：蟹肉茶碗蒸
茶碗蒸非常滑溜，淡淡都充滿鮮甜的蟹肉味！
鮨燐廚師發板：蜜柑鯛壽司
鮨燐嘅廚師發板由蜜柑鯛開始。養殖鯛魚時，飼料中加入蜜柑皮，令油脂豐富的魚腩部位帶有淡淡蜜柑香，夠晒清新，作為頭炮嘅壽司，睇得出廚師嘅用心。
鮨燐廚師發板：白烏賊壽司
烏賊具有透明感嘅白色，肉質新鮮彈牙，細膩嘅甜味同口感，非常驚喜。
鮨燐廚師發板：深海池魚壽司
估唔到鮨燐午餐嘅廚師發板都有深海池魚！池魚肉質鮮嫩肥美，脂厚油香，入口魚油甘香細膩，令人齒頰留香。
鮨燐廚師發板：北寄貝壽司
北寄貝產自北海道，肉質肥厚、口感鮮甜爽口。
鮨燐廚師發板：牧丹蝦壽司
蝦肉非常鮮甜，口感彈牙外，仲非常膠口。
鮨燐廚師發板：鰤魚壽司
冬天係食鰤魚嘅最佳季度，肉質緊實，油脂豐腴，鮮美且醇香濃郁，脂香四溢。
鮨燐廚師發板：金目鯛壽司
金目鯛以濃鬱嘅鮮味、細膩嘅脂肪聞名，鮨燐廚師特意用炙燒嘅方法去突顯金目鯛更深層次嘅油香。
鮨燐廚師發板：赤貝壽司
赤貝肉呈橙紅色，色澤非常新鮮，口感爽脆而柔軟幼嫩，味道鮮甜濃郁，加上柚子皮，更突出赤貝嘅鮮甜味。
鮨燐廚師發板：中拖羅壽司
中拖羅脂肪含量恰到好處，肉色粉紅，口感柔嫩，加上無筋，更能細味油脂甘香與魚味鮮甜。
