【A&M Diary】有時簡簡單單，唔會過於複雜，讓味蕾更能夠細味每種食物嘅本質，就係幸福嘅味道。嚟到灣仔嘅泰國簡單廚房，餐廳唔玩花巧，返璞歸真，從正宗嘅味道入手，以各種不同嘅香料調味，簡簡單單呈現正宗嘅泰國菜。
泰式無骨鳳爪沙律
泰式無骨鳳爪沙律嘅份量十足，主角當然係鳳爪，醬汁酸酸辣辣夠晒入味，配角就有甘荀絲，洋蔥絲，夾埋一齊食，口感爽脆，整體嚟講夠晒開胃。
沙嗲串燒
食泰菜又點少得沙嗲串燒，串燒有豬肉同雞肉，燒到帶有微微嘅碳焦香，但肉質都依然可以好juicy，至於沙嗲醬非常香濃，除咗花生香味，仲有種蜜汁嘅微甜味道，極具層次。
蝦醬炒芥蘭
一上枱就已經聞到好香嘅蝦醬味，廚師除咗落蝦醬之外，仲加左蒜蓉同辣椒，令芥蘭變得不只有一種蝦醬味道而過於單薄。
泰式炒雞肉金邊粉
金邊粉可以揀蝦、雞肉或豬肉，而我哋就揀左雞肉。啲雞肉夠晒大舊，而且非常嫩滑。其他配料仲有豆卜、芽菜、蛋絲等，而醬汁分量啱啱好，唔會太濕，但又可以令到每條金邊粉都掛上醬汁。
凍奶茶、凍青檸水
泰式奶茶一向都係奶味較重，不過用嚟解辣都係個唔錯選擇；凍青檸水無額外加糖，所以非常清新。
