【A&M Diary】有時坐喺一間舒服嘅餐廳，不知不覺就等一天多一天再半天喇！位於尖沙咀厚福街嘅aga Restaurant & Bar，餐廳以灰黑色為主調，配上水泥牆、木枱同黑皮椅，簡簡單單但盡顯形格，餐廳更設有戶外座位，真係夠晒chill！除咗設計風格之外，餐廳主打西餐，出品精緻又好味，可以邊食邊打卡啦！
椒鹽蛋白茶樹菇
平時去西餐廳都係食薯條，呢度就比較特別，有炸茶樹菇。味道分別有松露蛋白味同椒鹽蛋白味，而我哋就揀咗椒鹽蛋白味。炸過嘅茶樹菇好特別，比起食薯條無咁膩無咁飽，非常香口。
龍蝦汁蟹波
用份量十足嘅蟹肉整成嘅蟹肉波波，驚喜完全唔厚粉，食之前可以沾上適量嘅龍蝦汁，令味道大大提升，仲有沙律菜伴碟，令成個前菜無咁單調。
明太子珍寶帶子扁意粉
帶子好彈牙無雪味，扁意粉掛醬一流，除咗帶子之外仲有飛魚籽同三文魚籽，加強意粉嘅口感，食完覺得好滿足！
西班牙風乾火腿薄餅
薄餅係薄身，餅邊好脆，除咗風乾火腿，當然唔少得火箭菜，整加至fresh嘅感覺。
