【A&M Diary】倫敦嘅消費真係好高，平時喺市中心食餐飯，閒閒哋每位10幾英磅落樓。如果好似我哋咁擁有亞洲胃嘅話，喺倫敦食亞洲菜，價錢可能會更貴呢。但估唔到今日嚟到倫敦嘅Hammersmith行街，竟然遇上城市驚喜呀！呢間主打泰國菜嘅Poppy’s 2由泰國人主理，不平日嘅泰式午餐，有齊前菜和主菜，都只係£7咋！
Prawn Cracker
餐廳老闆好似好鍾意打獵，所以成間餐廳都放有唔同嘅動物標本，加上用色獨特，整個設計風格玩味感十足，配合各種花花配襯，真係四圍都係打卡點呀！午餐其中一個前菜就揀咗炸蝦餅，蝦味香濃，非常香脆。
Spring Rolls
春卷即叫即炸，配料以素菜為主，份量估唔到有四條，非常豐富。不過，我哋就略嫌春卷唔夠香口同脆身。
Green Curry with Chicken
用上唔同香料調制嘅青咖哩，味道非常香濃，極具層次。雞肉份量無因為午餐而縮水，好似食極都有。至於，米飯竟然係用上泰國絲苗米，飯香軟熟，值得推介。
Pad Thai with Pork
雖然呢個Pad Thai，唔知點解咁多醬汁（乜Pad Thai唔係乾身啲咩？），但勝在即叫即炒，鑊氣十足，而且份量同樣十足，夠晒飽肚。
