【A&M Diary】食米線真係會食上癮㗎！講真米線之所以咁吸引，好大原因係嚟自個湯底！除咗一般嘅酸辣同麻辣，仲有相對養生嘅藥膳湯底分庭抗禮，各有所好。我哋今日就嚟到位於灣仔嘅盈記四季養生麵館，呢度除咗主打嘅藥膳雞湯，仲有蕃茄湯底同叻沙湯底。
藥膳上湯自家製水餃
水餃嘅湯底同樣嚟自鎮店嘅藥膳上湯，湯底充滿濃香嘅藥材味，而水餃係自家製，餡料豐富，充滿口感。
藥膳農場雞麻油養生湯米線
湯底濃郁又夠足料，眼見有紅棗、圓肉、木耳等，味道甘甜。由於我哋加埋麻油，令湯底更帶有麻油香味，味道非常有層次。雞有4件，其中2件雞髀、1件雞胸同1件雞背脊，雖然唔太明點解每個部位一件，但雞髀確實嫩滑。
鮮茄牛肋條湯通粉
除咗藥膳湯底，店員亦推介鮮茄湯底，酸酸甜甜特別適合無乜胃口嘅夏天。蕃茄味濃郁，我哋特別選擇咗通粉，因為通心嘅部份會索晒啲蕃茄湯，好惹味。至於牛肋條份量超多，仲帶點牛筋，好有口感。
