【A&M Diary】A姐想睇嘅嗰套戲，原來就快落畫，應承咗同佢睇但又唔記得添，好彩仲有數碼港戲院呢個選擇！講真如果我哋唔係因為睇戲，都唔會特登走入嚟數碼港呢！嚟到夜晚嘅數碼港，餐廳選擇唔多，好彩仲有金記冰室，更真心覺得呢間金記嘅出品比其他金記更好味。
炸雞髀配沙律
雞脾大大隻，雞皮炸到乾身，所以食嘅時候，無咁大罪惡感。雞皮鹹香味十足，雞肉嫩滑；沙律入邊有薯仔、粟米、蘋果同桃等，沙律汁撈得均勻。夏天食沙律真係夠晒爽快。
鹹魚雞粒炒飯
A姐是日金句：「炒得好味嘅鹹魚雞粒炒飯真係好好味！」炒飯即叫即炒，炒得乾身，米飯粒粒分明，夠晒鑊氣。鹹魚雞粒炒飯嘅重點當然係鹹魚啦，鹹魚切得細粒，融入炒飯當中，所以每一啖飯都充滿住鹹魚嘅鹹香味，好惹味。
XO醬蝦球炒西蘭花
蝦球有成6大隻，新鮮彈牙；而西蘭花爽口，索晒XO醬嘅香辣味。
