【A&M Diary】作為香港嘅中心點：旺角，餐廳食肆林立，但又好似從來無聽過啲人話去旺角食米線。今日，我哋得到旺角在地人米線推介，嚟到雲魅，打破旺角無米線食嘅傳聞！呢間米線店同一般我哋食開嘅米線好唔一樣，因為呢度主打石鍋過橋米線，石鍋熱辣辣，就最啱呢啲涼浸浸嘅天氣啦！
蒜泥白肉
白肉份量唔多，但味道一流，蒜泥比例啱啱好，蒜香一流又唔會太重口味。
文山精緻配料加肥牛配雲魅香辣湯
終於嚟到今日嘅主題：石鍋過橋米線。上枱嘅時候，每一碟配料都係生嘅，全靠石鍋嘅熱湯令食材變熟。文山精緻配料除咗肥牛，仲有酥肉、炸醬、鵪鶉蛋、蝦、響鈴、帶子、蟲草花、粟米、芫茜、蔥同酸菜等。所有配料都夠晒新鮮，我哋根據枱上所示，按次序放入配料，樣樣食材嘅生熟度啱啱好，特別鍾意蟲草花，令湯底更香。至於雲魅香辣湯無得揀辣度，但我覺得辣度大概為小辣，好惹味。
香格里拉豪華配料加肥牛配雲魅特色湯
香格里拉豪華配料除咗肥牛，仲有酥肉、鮑魚、帶子、生菜、酥肉、竹笙、蝦、響鈴、炸醬、芫茜、蔥、鵪鶉蛋同蟲草花等。同樣地按次序放入配料，牛肉好嫩滑，而竹笙同響鈴索晒湯真係好好味。而雲魅特色湯即係酸辣湯，酸辣味唔濃，湯底清香。因為係石鍋關係，所以食到尾個湯仲係好熱，值得一讚！
