【A&M Diary】灣仔嘅新景園咖喱小廚真係一個詛咒！詛咒？話說M佬喺大概半年前就bookmark咗呢間餐廳，但第一次摸門釘係因為無check到原來新景園咖喱小廚星期日係唔開。之後特登揀星期六晚市，但我哋又無留意佢Facebook，結果去到先發現店主有私人事務要處理，晚市暫停，呢次係第二次摸門釘。後嚟因為疫情嚴重咗，餐廳為保障客人同員工安全起見，全日不設堂食，呢次係第三次摸門釘…… 好似一直都同新景園咖喱小廚無乜緣份，但我哋唔會放棄，因為「同舟人，誓相隨」，終於喺無心插柳嘅情況下，畀我哋試到新景園咖喱小廚嘅咖哩豬扒飯喇！
咖喱豬扒飯
嘩！嘩！嘩！豬扒份量超多，一個人真係無可能食得晒！豬扒切得厚身，皮香脆且乾身，肉質軟腍，非常有肉汁，好juicy又勁入味，但講真食得多真係會「溜」，好彩同M佬開心share咋！但重點當然係佢個咖喱汁啦！平時出面茶餐廳食咖哩，唔知係咪為咗迎合小朋友口味，所以咖喱汁係完全唔辣，但新景園咖喱小廚嘅咖哩汁除咗好香咖喱味，仲有適中嘅辣味，又香又辣，味道好有層次，撈飯一流！所以呢度基本上每枱客都會order一碟咖喱豬扒飯！
乾炒牛河
除咗咖喱，另一個比較多人叫嘅就係乾炒牛河。乾炒牛河即叫即炒，夠晒鑊氣，份量十足！
