【A&M Diary】近日天氣嚴寒，最啱就梗係打邊爐啦！香港人熱愛打邊爐，所以市場上有好多火鍋店，競爭非常激烈，而相馬日式火鍋就經常推出唔同套餐，所以次次嚟都有啲新鮮感！今日就同A姐嚟到相馬日式火鍋位於西環全新開業嘅分店，試佢嘅180分鐘特盛海鮮套餐，海鮮同肉類都係任食！
湯底
相馬嘅湯底選擇都好豐富，包括：清湯、甜豉油、蕃茄、豚骨同中華辣湯等，但我同A姐一向都鍾意甜豉油湯底，就算係鴛鴦鍋，我哋都鍾意兩邊都係甜豉油，一邊淥肉，一邊淥菜，咁食起上嚟就相對健康。
海鮮拼盤
海鮮係今日嘅重點，當然都係可以無限追加，勁易就回本啦！海鮮選擇有蜆、螺、蠔、海蝦、大頭蝦、青口、蟹柳同帆立貝。大頭蝦上枱時仲勁生猛，成隻手掌咁大，蝦肉新鮮彈牙，蝦頭勁多膏呀！蜆夠鮮甜又無沙；蠔洗得乾淨，脹卜卜好飽滿！而將海鮮放入甜豉油湯後，成煲湯勁鮮甜。
牛肩胛
脂肪分佈平均，肥瘦適中，牛味濃郁。
豚肉片、滑雞件肉
除咗牛肉之外，仲有豚肉同滑雞件。豚肉切得夠薄，易熟有口感，豚味十足；而雞件就夠嫩滑。
火鍋配料自助吧
自助吧選擇唔少，有丸類、菇類、蔬菜、烏冬、響鈴等。
熟食
除咗打邊爐，呢度仲有雞翼放題，有成7款口味，仲係單骨雞翼，唔怕太多，又可以試齊各款口味。另外，仲有天婦羅、炸物、燒物等等，真係好多選擇！
