【A&M Diary】作為大埔舊街坊嘅我哋，萬利小食店絕對係我哋嘅童年回憶。以前中學就喺附近，早餐就食腸粉燒賣，午餐就嚟呢度買車仔麵。佢嘅濃郁湯底，真係第二道食唔到，所以每次返大埔，萬利小食店都係我哋嘅必然選擇。
腸粉
混醬係常識吧！麻醬好幼滑，令腸粉更香更滑，加埋芝麻同甜醬，味道更有層次啦！
A姐之選：牛腩、冬菇米粉（小辣）
嚟萬利車仔麵就算唔叫牛腩都要加腩汁，因為腩汁肉香味濃，牛腩軟腍，份量又多；冬菇炆到入晒味。平時食開中辣嘅A姐，嚟到呢度就要改叫小辣，因為佢哋呢度嘅辣真係唔講得笑，辣味超濃，多惹味。
