【A&M Diary】香港各大酒店都先後推出唔同嘅「住宿+餐飲」Staycation優惠等大家喺香港都可以重拾旅遊嘅歡樂時光！而今個weekend我同A姐就揀咗萬豪國際 Marriott International 旗下位於灣仔嘅香港萬麗海景酒店（Renaissance Hong Kong Harbour View Hotel）。酒店雖然已經有超過30年歷史，而最近一次翻新就係2013年，好彩保養都做得唔錯，而且仲有唔少嘅驚喜入住體驗。
酒店大堂
酒店位處香港會議展覽中心上蓋，由灣仔站步行5-10分鐘即可到達，未來更喺正港鐵會展站隔離。除咗鐵路，旁邊就係灣仔天星碼頭同巴士總站，交通非常便利。而可能今日酒店嘅入住率唔高，所以我哋下午1點半已經可以check-in，而職員仲主動咁幫我哋安排聽日3點鐘先check-out，真係可以瞓個靚覺啦！
客房區域
酒店一共42層，提供超過800間客房及套房，而我哋今次入住24樓嘅海景大床房，景觀主要係港島東區、九龍黃埔，以至係郵輪碼頭一帶嘅維港景，雖然就睇唔到中區嘅商業大廈，不過，景觀都好開揚。
房間唔算大，而呢度嘅床就相對其他新嘅五星酒店細張，而且我哋略嫌床褥太軟，好彩床單同被鋪都好新好舒服。
窗簾同燈光控制喺床邊。瞓覺時更可開啟預設嘅夜燈模式，插頭數量唔多，而且酒店都有一定年資，所以未有USB叉電位，入住時記住帶埋插頭喇。
房間有別於一般酒店鋪上地墊，而用上木地板，喺疫情期間反而曬得更乾淨衛生。
房間當然唔少得衣櫃、保險箱、拖鞋同浴袍啦！房間內嘅mini bar有免費嘅咖啡同茶包。萬麗酒店為住客提供本地文化體驗，有特式中國茶同茶杯！房間走廊設有大門以分隔浴室、衣帽間同睡房區域，令空間顯得相對獨立。
