【A&M Diary】無得飛嘅同時又想過一個輕輕鬆鬆嘅weekend小旅行，咁當然唔少得玩吓香港酒店Staycation Package啦！除咗可以過吓二人世界，游水同做gym之外，嚟到秋天，想提升Staycation嘅旅遊氣氛，梗係想出去行吓，喺草地野餐，呼吸新鮮空氣，咁至夠feel啦！今次我特別為A姐安排咗呢個位於灣仔六國酒店嘅綠悠時光住宿計劃，由戶內玩到戶外，再由戶外食到戶內，性價比超高呀！
酒店大堂
酒店正對住入境事務大樓，由灣仔港鐵站步行3-5分鐘就可到達酒店大堂，交通非常便利。而Check-in櫃台嘅職員服務好好，仲細心幫我哋安排聽日嘅4點鐘先check-out，咁我同A姐就可以瞓埋美容覺先走啦！六國酒店前身為六國飯店，其中，1957年嘅小說《蘇絲黃的世界》入面，作者所講嘅「南國酒店」，靈感就係嚟自六國飯店，所以六國酒店嘅大堂都放有唔少歷史相片，簡直就好似入咗博物館咁。
市區野餐
今次呢個綠悠時光住宿計劃主打市區野餐，所以我哋返房放低行李，就先參加野餐活動，坐酒店安排嘅豪華轎車去我哋今日嘅目的地：添馬公園。
（豪華轎車視乎當日安排及住客人數，有機會係四人座/六人座，以下之豪華轎車之圖片只供參考）
^提提你：豪華轎車往返接送服務需最少提前三天預訂，如果想預約你想嘅時間，就要提前預約喇。而目的地分別有4個選擇：添馬公園、山頂公園、數碼廣場或中山紀念公園。
呢個綠悠時光住宿計劃除咗有豪華轎車接送，就連野餐嘅用具，好似野餐籃、野餐墊、木托盤同汽球等等都可以免費租借，夠晒方便之餘，仲啱晒A姐同靚景影相打卡啦！
至於酒店安排嘅野餐盒，嘢食都好豐富，包括：法式燒牛肉麵包、芝士拼盤、曲奇、鮮果杯、礦泉水同紅酒，真係夠晒chill！而且今日天氣好好，吹住微風，野餐同時欣賞維港靚景。講真，我哋拍咗咁耐拖都好似未試過咁悠閒，傾吓計同野餐添！
而回程亦只要提前15分鐘打俾司機，佢就會接你返去酒店喇，真係好方便！
客房區域
六國酒店嘅樓層由19樓開始，提供超過一百九十間客房，今次酒店特意免費upgrade我哋入住全新裝修嘅精選尊尚客房，房間夠晒大，而根據網站資料顯示，面積有大概300呎添！而講到一間房入面，最重要一定係張床啦，床鋪乾淨企理，完全無起毛粒，好滑好舒服，床褥適中偏硬。
作為鬧市嘅商務酒店，景觀尚算開揚，而今次住嘅房間能夠眺望IFC同有少少海景。而我同A姐最欣賞嘅係呢間房長長嘅書檯，啱晒我哋臨瞓前寫吓稿啦！
房間採用開放式衣櫃，當然有保險箱、拖鞋同浴袍啦！房間內有免費咖啡同茶包，每日仲有兩支免費支裝水，有驚喜！
值得一讚嘅係呢間全新裝修嘅精選客房，房間嘅書枱同床邊都有USB叉電位，十分細心。
浴室區域
A姐話住酒店最重要就係個廁所，而佢表示非常滿意！特別係有啲酒店嘅洗手盤旁邊放嘢嘅位置唔多，但喺六國酒店，佢可以將10幾支護膚同化妝品放晒出嚟之後，仲有大把位，而且更重要…更重要…更重要係好夠光！而我地今次住嘅房間係用浴缸，玩完一日，都可以浸吓浴。酒店嘅沐浴用品為自家品牌，味道都算唔錯。
健身室
酒店設有健身中心，不過，因疫情下未有開放，如果唔係食到飽飽都可以去做吓運動減肥。
