【now.com生活】香港人工時長又壓力大，唔夠瞓之餘又瞓得差，眼圈深到成隻熊貓咁。除咗睡眠質素，原來仲有其他原因都會導致黑眼圈，你又知唔知？Now生活教室今集繼續有曹信恩註冊中醫師教大家減淡黑眼圈嘅食療同埋穴位按摩。
唔同顏色嘅眼圈反映唔同嘅問題，譬如深黑色嘅色素形眼圈就係因為濕疹、曬得多或者卸妝唔乾淨，而帶紫嘅血管性眼圈係因為鼻敏感。另外，壓力大都加深眼圈，因為壓力大會影響肝，而肝虛弱就會引致血氣差形成「血瘀」，加深黑眼圈嘅黑色素。
除咗食療，平時喺Office無野做，大家都可以按摩以下四個穴位（見圖）改善眼圈：印堂穴，攢竹穴，陽白穴同埋四白穴。每個穴位只要輕力打圈按摩30秒就得㗎喇
減退黑眼圈食療
材料：當歸10克、丹參9克、杞子9克、菊花9克
製作方法：先大火煲滾，然後轉中火，4碗水煮成2碗，早晚1次
以上資料只供參考，如有疑問，請諮詢註冊中醫師為宜。
特別鳴謝：曹信恩中醫師
