【Viu】許志安一連三場紅館個唱今晚尾場，嘉賓請嚟「歌神」張學友，全場fans一見到歌神出場就嗌破喉嚨，尖叫聲響遍成個紅館！二人將《一家一減你》、《我應該》mix埋一齊唱，難掩興奮嘅歌神話今晚做嘉賓有兩大開心事，一嚟就係見返安仔上返台唱歌，二嚟佢話自己開到口想買飛都買唔到，不過做嘉賓就有4張飛，咁就勁happy啦，真係好cute cute呀！
安仔亦有講到搵歌神嚟做嘉賓係因為自肥，目的係想同歌神親近，學友一聽到就即刻拖起安仔隻手，搞到安仔勁怕醜呀！學友繼續放笑彈，自嘲唱歌瞇埋眼，所以連安仔嗰part歌詞都記埋！佢臨落台前許願安仔快啲再開騷，兼唔好淨係開3場咁少，唔知安仔又點睇呢？
個唱去到medley部份，安仔跑到兩邊嘅延伸台同fans近距離互動，帶嚟《將冰山劈開》x《非一般愛火》x《火熱動感 lalala Lai Lai Lai》，不時遞咪畀fans對唱，氣氛高漲！
尾場捧場嘉賓有BIG FOUR嘅梁漢文攜眷、蘇永康一家三口，仲有佘詩曼、陳友、方力申、鄭融、鄺美雲、彭秀慧等！另外，後台塞爆花籃，除咗父母嘅花籃之外，圈中人包括四大天王之三嘅張學友、郭富城、劉德華，仲有BIG FOUR成員張衛健、梁漢文、蘇永康，容祖兒、譚詠麟、胡楓、成龍、衛蘭、黃子華、黃伊汶、陳國坤、陳慧嫻、張敬軒、草蜢、謝霆鋒、李克勤、盧淑儀、陳慧琳、方力申、梁詠琪、胡杏兒、Lokman、Alton、AK、尹光等都有送花籃賀安仔Good Show！
