【Viu】古天樂一連兩場澳門演唱會上周六晚（29日）開鑼，佢獻唱經典電影《百年好合》嘅搞笑歌《暗戀王》，「自從我峨嵋山上見到你 ，我好想飛鵝山上見返你！」一出即全場歡呼，再播埋《百》片嘅片段，大家都知特別嘉賓就係好拍檔Sammi鄭秀文，兩位隨即合唱《煞科》！Sammi仲話：「我預想到你八、九十歲開演唱會，但到時你唔好滾攪我，我應該都發福晒！」
另一位嘉賓「小豬」羅志祥就喺Encore環節登場，同古仔合唱張國榮嘅《第一次》，又落力幫古仔伴舞，笑爆全場！小豬用廣東話拆解同古仔嘅「第一次」時唔小心爆粗，古仔即時幫手做翻譯，又撒嬌要求古仔喺台上重演當年嘅「新娘抱」，古仔亦從善如流照做，抱完仲明窒小豬話：「喂！你重咗咁多嘅？」
古仔率領全場跳完《今期流行》嘅「拜神舞」後，觀眾仲未夠喉，最後古仔兩度Encore並以哥哥嘅《風再起時》為首場劃上完美句號。
