【Viu】舞台劇《大龍鳳》 噚晚第一場演出成功，謝安琪、蘇玉華、小薯茄、農夫、Locker林家熙、林千渟等撐場都一致大讚。眾演員如釋重負，首次跨界任監製嘅張繼聰喺台上多謝觀眾，又邀請老闆古天樂上台，古生簡潔有力咁話：「多謝，完畢。」正當阿聰叫大家向觀眾鞠躬前，古生就踢爆阿聰出台前幾晚發怪夢，並得悉大家排練時遇到不少問題，卒之都迎刃而解，並大讚：「但今日都一一克服，我見到一個好圓滿嘅表演！多謝大家，多謝台下咁多位！」
阿聰直言第一次面對咁大壓力，做演員都冇咁緊緊張，「但今日真係好感動，全靠團隊嘅努力同老闆（古天樂）嘅支持，先有機會俾我哋去嘗試同成長。」又笑言有偷望過坐喺身邊嘅古老闆，見對方展露笑容，相信已經「收貨」，直言終於安心瞓覺，並可以破例食宵夜慶祝！
廖子妤、何嘉莉對新人Elvin黃梓僑嘅表現讚不絕口，Fish問：「真係第一次做？」Elvin謙虛話對手太好、監製同導演都太好，畀到佢好多信心！同樣首度演出舞台劇嘅何嘉莉坦言係自己暫時最感動嘅一次演出，忍唔住係咁喊！Fish就話自己喺三個月嘅排練好似上堂咁開心，自己亦有好多不足，要好好學習！
朱栢謙大讚一對「仔女」Elvin、吳冰非常醒目，做戲過程非常愉快，甚至有時要靠阿冰嘅支撐嚟入戲。而首演結束後半個鐘，阿冰直言心情夾雜住開心同迷茫，仍然沉浸喺混亂同興奮嘅氛圍當中！ 另外，古生又預告之後會出品更多舞台劇，當被問到有冇機會出演一角，佢就話：「搞咗演唱會先啦！」
