【Viu】古天樂今明兩晚喺紅館舉行首個演唱會《MY FIRST SHOW》，逾百古迷、古太一早就企喺紅館門外霸個靚位送古Daddy返工！喺大約近2點半，戴住黑超、工人褲look嘅古生乘坐7人到達紅館，原本就直接駛入場館嘅，但古生突然連人帶車倒車出返嚟，駛至fans前，然後打開側邊車門同大家打招呼，sweet又窩心呀！
同古迷打完招呼後，心情靚爆嘅古生先上香後入場館，直到吉時3點，就同成班工作人員進行拜神儀式，惟呢次儀式有別於過往演唱會對住火車站方向進行，而係將成個壇移師至紅館旁邊通道，兼有黑色圍板圍住！成個儀式大約10多分鐘，全員邊切燒豬邊歡呼，預祝兩晚演唱會成功！戴住白色帽嘅老友宣萱、胡子彤亦有參與拜神，事後更食住燒豬同古Daddy影合照，莫非佢哋真係做嘉賓？
除咗紅館場外聚集古迷外，喺隔離商場嘅限定周邊商店亦有近百古迷大蛇餅support古Daddy！
