【Viu】古天樂一連兩場《MY FIRST SHOW》澳門站昨晚（30日）舉行尾場，古老闆繼續唱出多首情歌《新手戀愛》、《天真》冧古太們。除固定嘉賓外，昨晚仲有姜濤、汪明荃及劉俊謙等嘉賓助陣！
姜濤出場俾古老闆拖住合唱張國榮的《當年情》，又開心到即興跳段舞！講返當年相見，姜濤話MIRROR出道已獲古老闆約食飯同鼓勵，每次開騷見佢好嚴肅咁坐喺觀眾席都會好緊張，不過亦令佢做得更好，今日終於見到古老闆有唔同嘅表情。古老闆就笑言下午綵排見姜濤未剃鬚！講到姜濤偶像「小豬」羅志祥前一晚撒嬌要「新娘抱」，姜濤都有樣學樣，但就係反轉要求古仔俾佢抱一次，因為怕古老闆抱佢後會腳斷喎，見古老闆唔答應，又扮小豬撒嬌甫士，超爆笑，最終都成功抱得男神。姜濤表演完仲喺後台同阿姐汪明荃集郵，真係收穫甚豐呢！
過去三場港、澳演出，「城寨二子」林峯、胡子彤均出盡力表演，是夜就連「信一」劉俊謙都驚喜登場開金口，同古老闆、林峯、胡子彤一齊合唱《跳舞街》、《最緊要好玩》、《Monica》等經典快歌，四個人走勻四面台狂扭狂唱，投入之極啊！唱完歌古老闆就問劉謙之前三場唔見人：「究竟有冇睇住城寨㗎？」劉謙就話自己好努力聽晒所有歌，點知古老闆即場考佢：「唱《杯麵》嚟聽下！」劉謙成個呆咗，仲以為叫佢俾個背面大家睇，最後要跪地連講三次「對唔住、對唔住、對唔住」，先過到關！講到城寨業務，劉謙正經匯報電影已拍完！古老闆話已講過唔收貨，劉謙唯有再認錯，之後林峯話自己喺城寨睇住四仔，但劉謙竟然走咗去尖東，古老闆反問「你點解去咗尖東？」林峯即刻煞停：「好啦，劇情唔好透露太多喇！」
