【Viu】大癲！古天樂昨晚（23日）喺紅館演出尾場《MY FIRST SHOW》，壓軸嘉賓係劉德華，雙天王合體唱《獨自去偷歡》，全場古迷嗌到拆天！古Daddy同劉華都係灰Tee配牛仔褲，再加埋副黑超，十足孖公仔咁款！
劉華一上台就放飛自我咁，一支公喺台上面喪跑無時停，唱完就攬實古Daddy掀起高潮！之後二人話當年，講起合作往事嗰陣因咩事跪住講？古生感謝劉華私下成日鼓勵佢，最後獲劉華promise以後有咩事都隨傳隨到，夠晒雷呀！
另一嘉賓有草蜢孖古Daddy大跳《三分鐘放縱》、《紅唇的吻》、《又愛又恨》、《嗲噢》、《ABC》、《忘情森巴舞》，古Daddy特別點名感謝蔡一智做佢教練train佢副body！之後草蜢順勢即場邀古Daddy任佢哋10月澳門騷嘉賓，成唔成功？
至於尾場嘅《紀念日》搵嚟原唱之一嘅Stephen馮德倫，成件事都咪話唔surprise！古Daddy對住Stephen大講《老馮日記》對白「想節能，馮德倫！」宣萱搞笑慫恿Stephen講返古Daddy「輪胎能」嗰句國語對白嚟笑返對方，Stephen又有冇照做呢？之後「冬眠歌手」Stephen再帶嚟solo歌《屢戰屢敗又如何》，high到跑勻4面同觀眾自拍兼握手！
「城寨二子」林峯、胡子彤呢pair固定嘉賓依舊同古Daddy跳唱「城寨Medley」《跳舞街》x《最緊要好玩》x《Monica》，令全場氣氛高漲！古Daddy率林峯、胡子彤同古迷握手嗰陣野生捕獲掛欄中嘅馮素波！而林峯、胡子彤唔止專登改《Monica》嘅歌詞嚟送古Daddy，又透露《九龍城寨之終章》拍攝完成添！
最後一part嘅canto pop disco party更係玩到癲！古Daddy化身「柱男」邊跳pole dance邊唱《放任天堂》、《我沒有女友》、《我是你的天秤》，唱到《今期流行》全場陷入瘋狂狀態，萬人跳拜神舞極為震撼！最後古迷許願成功，再叫返古Daddy上台追加《風再起時》！
另外，尾場同樣吸引多位圈中人嚟睇騷，包括有狄波拉、謝安琪、何超雲、廖子妤同媽咪、周秀娜、張柏文、Yanny、陳考威、黃梓僑、湯君慈、張蔓莎、黃溢濠、何嘉莉、蔡一智老婆周雪芳等！當古生落台唱《吻得到愛不到》嗰陣攬實拉姑，so sweet！
而後台花籃數目亦多到花海咁勁墟冚，有劉德華、郭富城、成龍、任達華、何超蓮、謝霆鋒、容祖兒、梁詠琪、張柏芝、草蜢、胡楓、張敬軒、任賢齊、張繼聰、謝安琪、張智霖、袁詠儀、羅嘉良夫婦、蘇永康夫婦、姜大衛夫婦、譚耀文、謝天華夫婦、傅明憲等送上花籃祝賀，古Daddy相識滿天下！
