【Viu】韓國男團 THE BOYZ 成員Q池昌珉、人氣新星金載原、宣萱、Tyson Yoshi同Mandy譚旻萱今日出席品牌活動，Q同金載原分別以廣東話同大家打招呼同講Bye Bye，又送上心心放題，仲分享對香港嘅感受，不約而同話想食點心添！
除咗兩位Oppa獲大批Fans撐場外，相隔一段日子冇公開現身嘅宣萱，亦吸引好多Fans支持，佢仲預告8月生日會將增加入場人數滿足Fans。宣萱又首度還原同古天樂出合唱歌同MV咀嘴嘅爆笑情形，自爆再入錄音室一度緊張到想打退堂鼓，又話同古仔合作無間，咀戲駕輕就熟啦！咦？咁會唔會亮相古天樂紅館騷做嘉賓呢？梗係等宣萱親自解答啦！
此外，Mandy大讚兩位Oppa好白滑，但自己擇偶偏好黑實運動型，古老闆就最啱心水，仲公開爭取同古老闆拍霸道總裁偶像劇，最好有咀戲咁話！識玩呀！想知就睇足本訪問啦！
