【Viu】電影《尋秦記》今晚舉行星光盛會首映夜，古天樂率林峯、宣萱、郭羡妮、滕麗名、白百何、苗僑偉、張繼聰、朱鑑然、洪天明、廖子妤、歐瑞偉、陳國邦、黃文標、徐偉棟、徐浩昌、伍詠詩等現身，而在場一早已有唔少「子民」fans等候，勁爆墟冚呀！古生喺典禮中特別感謝小說原著作者黃易、「烏博士」廖啟智！
講到聽日首日上映隔15分鐘就有一場，仲密過巴士班次，古生笑言方便大家去睇，希望能夠保持「一片紅海」呢個現象！唔知佢有冇信心打破2025年首日開畫票房數字？話晒古生有「穿越能力」，到時謝票嘅pattern都可以做到隔15分鐘一場？宣萱到時會唔會開金口唱《天命最高》？點知佢就拉原唱嘅古生落水，古生神回一句K.O.，笑爆嘴呀！
古生指聽日會同成班演員上廣州宣傳兼倒數，宣萱續話好耐冇試過工作中渡過，提到佢哋日前去內地宣傳，古生勁cute自動波托頭擺pose，宣萱笑言呢下都真係估佢唔到，定係當古生喺佢身邊就會變cutie？再講到單簽名笑料，古生再度神回：「我係長！」講完佢都忍唔住笑呀！
「大哥大」洪金寶擔任電影嘅動作指導，同時亦係首次同3位仔仔一齊做嘢，真係好值得紀念！佢大讚洪天明一直都打得好，又笑言專登設計啲難度高嘅動作畀古生！大哥大仲幽默自爆依家練咗個新絕招，遲啲拍戲使出嚟？講到戲癮，原來大哥大想原班人馬再拍《五福星》，走咗嘅老友就以其他方式「現身」，呢條橋ok喎！另外，洪天明突然好正式咁向公眾道歉，究竟發生咩事？舉家移民深圳settle down好未？想知就即刻去睇足本訪問片！
