【Viu】上屆香港電影金像獎憑《破．地獄》首膺影后嘅衛詩雅，今年第44屆又憑《再見UFO》首奪「最佳女配角」，詩雅首先哽咽多謝媒體朋友睇住自己大，仲話7年前拍攝《再》片時，正值迷惘期，好擔心之後仲有冇人搵自己演戲，所以好感恩遇到《再》片。詩雅又話要多謝華富邨上面出現嘅UFO同嗰班外星人，為香港成就咗一個美麗嘅都巿傳說！
講到連續兩年登上頒獎台，詩雅直言好神奇，事關幾個月前先知道《再》片可以上映，否則自己今年係冇作品㗎，所以多謝上天安排！詩雅話今次喺「阿哥」朱栢康手上領獎淡定好多，自覺比上年進步。當然唔少得要多謝老公周醫生啦，詩雅仲爆對方玩Kiss Cam時追住自己嚟錫，閃到盲呀！
Alex杜德偉憑《風林火山》成為「第44屆香港電影金像獎」嘅「最佳男配角」得主，Alex喺後台分享喺2003年同已故影星吳孟達合作電影，感受到達哥對演戲嘅熱情，對方仲送咗本書畀自己，因而令佢開始認真做演員。而《風》片正正係自己久別香港影壇嘅作品，所以今次得獎意義非凡，仲分享「孖生大佬」梁家輝點樣用神級演技示範一場重頭戲，自己當堂嚇到呆咗呀！
此外，黃淑蔓憑《再》片嘅《華富一號》獲「最佳原創電影歌曲」，佢都話唔知點解「嗲哋」朱栢康喊成咁，又話之後想挑戰演戲添！快啲睇足本訪問！
