【Viu】Michelle衛詩雅、陳家樂呢對老best今日合體搵真銀！家樂搞笑力sell下次客戶可以搵齊兩個「詩雅」加自己一齊出job，左擁右抱享齊人之福喎！佢哋一位係影后、一位係準影帝，酬勞有冇double、triple up咁上升先？之後又爆咗《不日成婚》合作內幕出嚟添！
講到農曆新年，家樂帶妻女搵三哥苗僑偉拜年，話歲半愛女Camila勁有存在感，冧到三哥暈晒大浪！依家就煩惱緊幫囡囡報讀N班嘅事，笑話囡囡嘅英文好過自己！而Michelle就同老公周醫生去完峇里島旅行，本嚟係for honey moon，但去到日日落雨冇出去勁冇癮，但會唔會就係因為咁就兩個去三個返？佢又點同老公慶祝結婚一周年？聽日（6日）老公生日，Michelle一反常態話準備咗小驚喜，係咩嚟㗎？
嚟緊英皇會搞個啟德群星騷，身為英皇成員之一嘅兩位，又會唔會驚喜獻聲？眾所周知家樂係參加新秀出身，仲同Lillian推出過《小確幸》，佢高呼冇人問過佢想唔想唱，但佢本人係好想唱，更大爆有出歌嘅心添！家樂今次堅唔係齋講㗎，真係行動中㗎，咁幾時有得聽？遲吓同陳太合唱？想知就睇足本訪問啦！
