【Viu】《第四十四屆香港電影金像奬》今日喺文化中心舉行記招，主席爾冬陞領軍，搵嚟上屆影后Michelle衛詩雅、曾獲提名「最佳新人」嘅Edan@MIRROR擔任特別嘉賓，宣讀提名名單！
坐台下嘅張繼聰憑《金童》二度入圍角逐「最佳男主角」，自爆聽到自己嗰名感動到眼濕濕！當得知古天樂雙料入圍，阿聰搞笑話呢個世界冇人鬥得過古天樂，定佢可以贏到兩個古天樂？面對入圍嘅仲有好友陳家樂、「老竇」梁家輝，阿聰又有冇信心爭返個影帝返嚟威畀APA班師弟妹睇？
佢又恭喜Ail李佳芯獲提名新演員獎，笑談當時叫對方直接進入情感禁區笑料！阿聰亦戥黃偉亮憑同戲入圍「最佳動作設計」！至於喺音樂範疇，阿聰宣布嚟緊4月喺麥花臣開騷，透露嚟緊會進行排舞，物理治療師已ready！唔知阿聰會跳邊瓣？艷舞？跟Kakaball跳K-pop？抑或係土風舞？
同時阿聰呢期仲返咗APA教書，呢位張老師自認係嚴師，會發脾氣對學生，一到上堂時間又會鎖門，真係未見過阿聰有呢一面！而為咗令學生代入拍戲不見天日日子，提議叫班學生通頂嚟上堂，呢條橋都幾有創意喎！
Michelle宣讀「最佳男主角」提名名單嗰陣勁激動，讀到老Best陳家樂個名嗰陣更係爆喊，直頭係開心過聽到自己入圍女配角！面對同為女配入圍嘅鄧濤、惠英紅、鮑起靜、滕麗名，Michelle有冇信心攞獎？
Edan自爆宣讀前好緊張，特別係「最佳音響效果」其一組入圍單位係泰籍，笑話事前練讀係有拼音，一打開名單係得英文，但都冇窒機，流暢宣讀！Edan今年陸續有作品面世，會唔會期待明年有機會入圍？對Stanley未能入圍男配，Edan開玩笑話「預咗」，會唔會hurt親大表㗎？
