【Viu】Tyson Yoshi為第二晚嘅「MIX SOME MUSIC!」音樂節演出，獻唱Rock版《Christy》同《Just break up》，唱得開心連外套都除埋，露出白背心仔同麒麟臂！
Tyson Yoshi演出完「MIX SOME MUSIC!」音樂節後受訪，佢話唱《數碼暴龍04無限地帶》因為之前cover過，而且覺得04係最好聽，佢亦喺演出前喺台邊探頭欣賞咗Mahiru表演！噚日兒童節，Tyson見湯令山post咗小時候嘅片，都有諗過post屋企人偷拍自己唱《超人迪加》既片，但唱得唔係幾好就算數！
講到身材縮水，Tyson話：「46腰都要改呀啲褲！」佢透露最近迷上跑步，發現自己都幾跑得，仲跑到瘦咗添！不過佢比較鍾意自己跑，因為成日要喺終點等friend好冇癮，仲笑言「無敵是最寂寞」，想想搵教練train吓，有機會會跑半馬！
有指林家謙係跑步界隱世高手，問到有冇搵老友一齊跑？Tyson即話費事搵，然後投訴家謙之前話做結婚禮物嗰首歌，Tyson追數不果，得到家謙嘅答案令佢好嬲，嬲到話：「呢條友係咁樣呃新聞喺個台度，整段嘢出嚟呃吓啲頭條，攞我過橋呀！非常可恥！而家嬲咗佢，唔想同佢講嘢住！唔好話跑步，text佢都費事！」究竟家謙講咗啲咩？
再問會唔會約家謙挑戰渣馬？Tyson繼續嬲道：「唔駛約，我一定勁過佢，一定！100%，唔駛約，肯定！賭咩都得！」仲話家謙冇可能見到佢尾燈，只能喺起跑線度見，「林家謙，你真係算吧啦！」
Tyson又透露買咗新電單車，因為已考到電單車牌，但唔係一take pass，要等買齊裝備天氣好再揸出去！再傾到同王嘉爾出咗首新歌，Tyson話冇派台亦唔會有MV，老友咁忙都肯出肯唱已好感激，又笑言：「有時拍啲勁過你好多嘅人係唔駛拍MV！」純痴佢名氣就有好點擊同好多聽眾！Tyson亦發誓話絕唔係王嘉爾巡迴個唱嘉賓，叫大家外圍唔好亂賭啦！快啲睇足本訪問啦！
