【Viu】Tyson Yoshi為第二晚嘅「MIX SOME MUSIC!」音樂節演出，獻唱Rock版《Christy》同《Just break up》，唱得開心連外套都除埋，露出白背心仔同麒麟臂！
後來Tyson忽然問觀眾：「嚟呢度應該要唱返啲同IP有關嘅歌，《數碼暴龍》大家有睇架呵？」聽到有觀眾話前一日AK已唱，Tyson就反問AK係唱邊個版本？之後再搞笑謂：「01就有啲大路囉，就有啲....都唔知係咪真係鍾意囉？！」隨即大笑再大叫：「講笑！講笑！」Tyson問有冇人睇過04，繼而唱出《數碼暴龍》04嘅《無限地帶》，期間啲觀眾唔再掟Bra上台，而係掟咗隻cute爆嘅亞古獸公仔上台，Tyson拎住公仔唱晒成首歌，好貼題呢！
睇嚟Tyson好想展示一下啲肌肉，佢指觀眾太冷靜好難令自己除衫，然後首唱《追》，再唱《1994》，期間一度拉起背心露腹肌，但未係真除，到唱《你不會一輩子的愛上我》之前就真係除到半裸上身，仲話：「縮晒水呢排！」但見打大赤肋嘅佢，胸膛巨大而結實，腹肌線條明顯，身材依然養眼呀，可惜唱到一半似乎耳機故障，佢不停搞耳仔位，最後直情除下耳機算數，想睇？睇現場實況啦！
