【Viu】新戲《一個部門的誕生》今晚舉行FILMART Party，一眾演員晒冷出席，包括白只、廖子妤、Rachel梁雍婷、戴玉麒、麥沛東、謝咏欣、伍詠詩、鄧月平、朱栢謙、徐偉棟、張達倫、肥腸、何求等，勁齊人呀！
戲中講到因戴玉麒 cut台不成，一怒之下衝去電視台挾持人質！對有關cut台、打上台查詢，麥沛東開心share有次試過打電話幫媽咪處理信用卡嗰陣，出到扮女人聲呢個大絕，SLDPK！之後輪到白只控訴某電訊公司處理不當，喺門市當眾叫佢扮女聲，呢單亦係笑爆肚！
朱栢謙呢期密密為《三一萬能合》排戲，大爆Sica勁癲喪，handle得住Sica？然後又爆岑珈其成日忍唔到笑，相信排練現場係超繽紛！同期白只都同老best「阿卵」楊偉倫排緊舞台劇《不舒適人》，佢揚言呢次會係同阿卵最後一次喺舞台劇上合作，堅唔堅呀？仲話依家互相都唔再覺得搞笑，但絕不放棄呢個關係，希望大家用同情心買飛支持咁話！咁樂隊朱凌凌幾時有新歌或者開騷？朱謙同白只有冇聽阿卵喺《星秀傳說》入面Rap？
對電視劇《存酒人》橫掃7項民間電視大獎，參演之一嘅朱謙話《存》係值得大家喜愛，希望有機會開第二輯啦！唔知佢又有冇留意「鬼妹」Asha組女團PAWS？
戴玉麒話電影係參照真人真事，當年太轟動，演之前都有參考返，戲中有大量動作場口？飾演警察嘅Rachel就話剪咗個skinhead男仔頭勁大突破，喺片場成日被撈亂佢同戴玉麒！Rachel仲自爆有一場戲大力推門到撞穿牆添！謝咏欣則話對住上司白只成日要忍笑，咁最近為George新歌《出甚麼風頭》拍MV又有咩難忘事？佢仲話睇好「Sugar」鄧濤奪影后，想知就睇足本訪問啦！
