【Viu】賀歲片《夜王》今日喺澳門舉行世界首映禮，「歡哥」黃子華、「V姐」Sammi鄭秀文率兩位囡囡「Coco」Louise王丹妮、「Mimi」Fish廖子妤，加兩位「老細」小野盧鎮業、謝君豪過大海，即場宣布年初一正式公映！
Sammi日前同埋EJ Girls落cantopop disco，開心話睇到團火呀，大家都玩得好盡興！佢更有種如釋重負嘅感覺，事關Sammi話吳煒倫導演將宣傳歌呢一個部份交畀佢，所以決定去disco係佢嘅idea，下次搵埋子華神一齊揈？子華神揚言心中有個minimum charge票房數字，係咪一過咗就可以揈先？
子華神預告年廿九輪到佢帶班EJ Girls出動，由旺角直踩落尖東謝票，有冇dresscode？講到《夜王》再有內幕流出，子華神同Fish有錫錫場口，子華神話都老尷㗎，再勁firm咁話冇下次，又笑言拍親熱戲好考演員定力，尤其係對方嘅另一半都係同戲演員！講講吓，子華神自爆錫到有「反應」，係咩反應先？
至於另一當事人Fish，扮返當日收到劇本見到要同偶像子華神kiss嘅反應，十足似喺經典meme出現過嘅土撥鼠，SLDPK！相反，Fish男友小野喺戲入面就要掌摑子華神，小野笑言幾驚摑完要退休！
