小儀去年尾無預警宣布升呢做人妻後首次公開現身，宣布同Lokman@MIRROR、梁仲恆 、王耀祖、阮韻珊等合演共14場嘅舞台劇《關於那隻龜回魂的故事》！正所謂人逢喜事精神爽，小儀全程笑容滿面、紅粉緋緋，喺用「龜」字嘅寫揮春環節，佢寫咗「蜜龜緣主」，嗰份甜係由心而發出嚟㗎！
事後小儀受訪表示係好興奮嘅，叫大家可以稱呼佢做「好好太太」，事關老公係「好好先生」，使唔使咁冧先？見小儀手上戴咗3隻銀戒指，邊隻係結婚戒指？度咗蜜月未？
笑提森美大哥曾形容其先生樣貌，「同Edan比輸少少，彭于晏贏少少；跳舞方面，同蔡一傑比都望塵莫及」，小儀又認唔認同呢？有一點佢承認嘅係嫁人係離職因素其中之一，想留返多啲時間畀自己！婚禮方面，小儀話同最close嘅親朋好友食咗餐飯就當係，不過就冇「前夫」Edan份嘅，莫非怕老公呷醋？唔知小儀有冇生B計劃？
Lokman今次角色特色就係躺平兼係啃老族，佢又點揣摩？講到新劇《喜劇開場》日前煞科，Lokman話希望大家鍾意，「無悔三兄弟」圓夢大放笑彈！繼佢、Edan後，Ian再有浸咗開團con資訊，呢日Lokman大膽許願，希望新圍con係跨年、戶外同場次係多過上次，最後加碼開WTF 3.0，果然膊頭有朵花嘅係唔同啲，許嘅願望都勁過人！咁唔知今年又有冇團綜呢？想知就要睇足本訪問啦！
