【Viu】小儀今日現身品牌活動，變身廚娘煮甜品畀街坊食！眨吓眼小儀離開商台已半個月，佢話都未習慣身份改變，因為最近都繼續有同商台嘅同事聯絡，仲未可以圓慢活夢，每朝因為一件事仍然要早起身！
自告別廣播界後，小儀坦承多咗工作機會，就連月尾生日都有job邀請，不過佢就講明要放生日假啦！之但係有錢又冇理由唔搵㗎嘛，小儀笑住賣關子指生日前連續3日都有開心錢賺，仲冧豬樣話被某人攞波打都願意硬食波餅唔避！畫公仔畫出腸咁，莫非係做MIRROR嘅閃避球大賽嘅MC？
開心錢仲有繼續同森美合體出騷，笑指依家森美孖阿正、Elsie組「Bad Girl大過佬」，小儀笑言戥森美辛苦呀，要對住兩個轉數快嘅妹妹！佢更對日前森美用條脷碌電話高呼：「蠢到癲呀！」又搞笑話希望阿正同Elsie早日擒住森美嚟打咁話！
睇到梁嘉琪受訪哽咽爆森美私下好嚴厲，小儀指嘉琪為人比較感性，但森美堅係好嚴厲，只係依家過咗更年期就收咗火，加上又偏心兼有年齡歧視，所以覺得阿正同Elsie真係好幸福！
另外，小儀係咪要做YouTuber？Last Day片破26萬views，遲吓好似Do姐咁搵嘉賓做訪問？夢想用1.3億買豪宅？想知小儀點答就要睇足本訪問啦！
