【Viu】商台今晚舉行66周年台慶，一眾DJ分別以動漫、F1賽車手主題打扮現身，仲要全部一律以綠色做主色！「綠燈俠」森美套戰衣超貼身，重要部位激凸勁爆！佢自詡冇攝襪、亦冇裝假狗，全身上下都係真材實料、袋袋平安咁話呀！森美大哥話套衫係自己揀嘅，喺屋企有試着過，但被老婆一句說話K.O.，SLDPK！同場見其節目監製都齊齊扮綠燈俠，森美話係專登㗎，咁先更突顯佢嘅雄風呀！
「動感超人」小儀笑言第一眼都以為大哥有攝pad，仲話有特別用手check添！唔知小儀係check上半身定下半身？望見小儀嘅呢身裝扮，森美大笑話以為係南京紅姐戴咗泳帽，真係畀佢笑死！小儀又點反擊？
而今晚亦係小儀拎30年長期服務獎嘅大日子，佢坦言不知不覺就做咗咁多年，最開心係接觸到勁多位靚仔，包括Edan，咁唔知森美有冇on list，定可以逃出小儀嘅「淫掌」？小儀大笑話如果係Edan扮綠燈俠，必定上下其手！佢又勁得戚向森美自爆林峯今日晏晝幫佢抹汗，點知再被森美神回擊敗！呢段訪問爆笑指數有10粒星，唔睇就走寶啦！
