【Viu】林峯今日現身昂坪出席活動，期間同fans玩遊戲又自拍，十足開fans meeting咁happy！自稱勁有儀式感嘅阿峯，指聖誕節會同屋企人交換禮物，咁啱日前佢又同老婆張馨月慶祝結婚5周年大日子，阿峯點冧爆老婆先？到底佢做咗啲咩嚟逼死全世界嘅男人？
最近阿峯推出新歌《我又戀愛了》，佢話係詞神Wyman睇完《九龍城寨之圍城》後，由「陳洛軍」第一身出發寫嘅愛情故事，阿峯笑指希望下次同Wyman合作唔使再等15年後啦！講到有網民指阿峯首新歌cover同Anson Lo《致我》嘅cover相似，阿峯稱冇睇過教主個version，相信各有風格，並指佢輯相係早喺開澳門演唱會前影：「男仔嚟嚟去去都係咁嘅裝扮啫！」
至於阿峯喺叱咤「我最喜愛的男歌手」15強止咗步，佢話冇唔開心，可以上到叱咤我最喜愛榜已經好surprise、好新鮮，多謝fans支持！另外，阿峯遲吓會同Sammi鄭秀文、姜濤等以嘉賓身份參與NBA傳奇名人賽，阿峯自爆細個勁鍾意儲籃球卡，記得足足有兩大盒，依家超值錢，估唔到阿峯細個就咁識「投資」！轉頭記得睇足本訪問呀！
