【Viu】林峯今日出席手機品牌活動，透露自己好鍾意打機，會適量課金支持遊戲開發者。講到手機內相片，阿峯直認囡囡Luna比例較太太張馨月多，但老婆一啲都冇呷醋，仲好叻剪輯片段加埋配樂，紀錄囡囡成長，係好珍貴嘅回憶。不過，囡囡只得四歲，佢哋就盡量唔俾囡囡接觸太多螢光幕，擔心影響眼部發展。
日前林峯去紅館欣賞郭富城演唱會，佢話一定要支持「城寨爸爸」，佩服對方嘅毅力，要練出一身肌肉唔容易。阿峯亦即將喺澳門開騷，笑言經理人想佢開心啲，所以未有刻意減肥操肌。雖然冇肉肉睇，但阿峯透露舞台表演同音樂都係重新編排，為明年紅館演唱會預熱，至於城寨兄弟會唔會做嘉賓？就要睇足本訪問等阿峯話你知。
