【Viu】林峯嘅澳門演唱會噚晚舉行尾場，邀得「城寨殘兵」嘅「十二少」胡子彤同「四仔」張文傑做嘉賓，齊齊合唱《馴獸師之王》，雖然獨欠「信一」劉俊謙，但尾場嘅觀眾依然「賺凸」，事關三子即興邀請咗原本喺台下睇騷嘅「王九」伍允龍上台，仲喺阿峯指導下學跳「火辣椅子舞」，大考舞功同腰力，當阿峯讚完胡子彤同張文傑跳得好好之後，就忍唔住笑伍允龍：「做咗第二樣嘢出嚟！」笑爆全場！其後阿峯喺Encore環節唱《幼稚完》，仲走落台對住Fans大合唱，再約定大家出年5月紅館見！
睇返阿峯咁多場神秘嘉賓，首場有Ron吳卓羲，佢哋合唱《別怪他》，唱完仲肉緊攬攬，阿峯坦言彼此雖然相愛20幾年，不過喺影視上合作機會唔太多，佢仲自爆當年好想將《別怪他》據為己有啊。去到第二場，阿峯就到視后佘詩曼擔任嘉賓，兩人合唱《愛在記憶中找你》贏盡掌聲，阿佘以黑色裙靚靚登場，同阿峯絕到絕！不過見慣大場面嘅阿佘竟然自爆驚到震，期間仲唔小心戴錯耳機，好彩阿峯即時為「女朋友」將耳機戴好，果然係合作無間的最佳CP啊！
第三場嘅嘉賓係農夫，原來農夫多年前出席頒獎禮，喺後台已經聽到全場大叫「農夫」，當出場先知表錯情，台下全部都係「林峯」燈牌，佢哋就此結下不解緣！其實第四場嘉賓都有城寨兄弟「十二少」胡子彤，但當日張文傑、劉俊謙都各有各忙，阿峯仲透露佢哋有個Group叫「城寨殘兵」。子彤不嬲係唱得之人，林峯仲忽然爆料預告子彤將會加入樂壇添！
