【Viu】林峯今晚出席名錶活動，講到澳門演唱會頭兩場喺社交網站洗版，阿峯話當係出年紅館騷熱身，預告紅館會有「升級版椅子舞」，嘩嘩嘩！咁會唔會Let’s get wet呢？阿峯就大賣「瓜子」喇！
講到吳卓羲（Ron）同佘詩曼做嘉賓勾起大家嘅集體回憶，阿峯就爆阿佘緊張到手震，仲笑言連老婆都叫阿佘做「女朋友」，Friend過打Band啦！咁問心以前係咪有諗過搶《別怪她》嚟唱先？阿峯就爆金句話：「我搶埋的話，Ron冇歌唱㗎喇！」笑到有腹肌呀！
至於網友集氣阿峯請黃宗澤（Bosco）做嘉賓，等佢再開金口，同樂迷「好好地相處」，佢就覺得唔樂觀，但期待同Bosco Dance battle咁話！再追問「常在心」鍾嘉欣同「城寨三少」同古老闆會唔會做嘉賓？阿峯就化身「瓜子大王」，仲和議同「城寨」Buddies玩爭櫈仔添！想笑餐飽就loop爆足本訪問啦！
