【Viu】Sammi鄭秀文最近請嚟哲學界KOL「好青年荼毒室」其中三位成員豬文、鹽叔同阿泉合作，將20年前嘅經典作品《愛是...》重新錄製，成為《愛是⋯2.0》。「好青年荼毒室」由十三位研讀哲學嘅年輕人組成，今次參與創作嘅豬文係牛津大學博士、鹽叔係倫敦國王學院博士生、阿泉係香港中文大學哲學系博士生。Sammi話係佢哋節目嘅擁躉，睇佢哋節目令自己對哲學多咗認識，所以特別邀請豬文、鹽叔同阿泉以哲學角度講愛情，炮製《愛是...2.0》。
三位「好青年」坦言最初接到邀請時，仲以為係電話騙徒，就算後來見到Sammi本尊仲係覺得成件事好夢幻、神奇。佢哋為咗呢首歌好認真寫Rap詞，期間好多創作意念走出嚟，Sammi對佢哋話：「唔使驚，只要認真去做就得架啦！因為『認真』就係核心，哲學畢竟係你哋嘅專業，用你哋專業知識放入呢首歌度，『認真』嘅態度，歌迷和聽眾都會感覺到。」
