【Viu】張敬軒今個月16號就會喺英國倫敦Royal Albert Hall舉行三場《The Prime Classics Hins Live in London 張敬軒倫敦演唱會》，噚晚(6號)軒公就出發飛去當地備戰，吸引逾三百名澱粉送機，場面相當墟冚！當中仲有fans對住軒公唱歌：「來讓我跟你走～」認真搞笑！
其實軒公係首位喺呢個殿堂級場地舉行三場演唱會嘅華人歌手，所以對於今次演出，佢都相當重視，特登提早十日飛去當地適應時差，希望可以帶到好嘅演出俾觀眾！其實軒公出發前，行程都好緊密，除咗閉關式準備演唱會，又連續拍咗兩個廣告，難怪佢都講笑話：「上到機真係可以有覺好瞓。」真係要瞓返個好覺啊，唔係邊有精神備戰啊？祝軒公good show啊！
