【Viu】張敬軒、陳蕾同Ashley林愷鈴今日出席品牌活動，噚日 42歲生日嘅軒公，一登場就吸引大批「澱粉」尖叫，仲笑認年紀大咗面皮變厚，一改以往唔鍾意慶生嘅作風，今年仲有Ian幫佢慶祝，大讚「陳總」嘅眼鏡Look征服全餐廳，客人只睇到陳總，又自爆鍾意佢嘅客人同鍾意Ian嘅客人年齡有差距，代溝好大呀！軒公透露Ian送咗中佬必備嘅頸巾做禮物，啱晒去倫敦開騷用，仲預告會首次帶父母去旅行，笑指係「帶著矛盾去旅行」，而「遮遮」都會同行，幫手照顧老人家。
至於陳蕾自認守唔到秘密，坦承即將同「Ianson」合體開拉闊音樂會，已經諗定藉口推卻買飛請求。正忙於同「Ianson」、Lokman拍《冰上火花》嘅Ashley，預告將有親熱戲，但邊位鏡仔係對手呢？佢就賣關子喇！
