【Viu】張敬軒、Jeffrey魏浚笙、阿正、洪嘉豪同張明偉噚晚突擊為賀歲片《超神經械刧案下》謝票，軒公對於升呢「千萬票房男星」就保持謙虛，仲自爆正努力操肌，預備派福利，可惜日前整理Studio時，畀成箱錄音帶壓傷手兼留疤，聽到都痛呀！軒公又話打算7月開放Studio畀巿民參觀，目前正煩惱緊網上預約系統，小編想舉手去呀！
阿正表明如果票房有2000萬，就公開珍藏已久嘅Jeffrey、軒公、白只同Angus嘅裸照，但就廢事po自己嘅裸照趕客喇！講到阿正同白只撞樣，軒公都加把口呀，話原本打算出story笑吓，最後忍痛刪除！
至於Jeffrey就自備墨寶派畀現場觀眾，又話同Tyson去軒公屋企食糕食到好肥。而嘉豪就話新年日日開工兼謝票，但就唔會公開冇格仔露股相派福利喇，以免變三級片。
