【Viu】《試當真》21位校花校草參賽者今日出席記者會，28號皓嵐同2號Shadow獲票選為「傳媒最喜愛大獎」得主，年僅14歲嘅皓嵐自認唔夠靚仔，但幕前經驗多係得獎同受歡迎原因，又笑言其他參賽者都叫佢前輩，亦唔覺得未發育會蝕底，因為自己會努力增高。Shadow就係畀同學「舉報」參選，經常被指似迪麗熱巴，但自己就覺得唔似喇，仲自爆冇人追亦冇收兵。
「靚仔組」就有43號John同32號Ivan，John被指似王大陸x彭于晏，但自認身高輸蝕，好彩暗藏一身肌肉拉分。Ivan就被指似金城武x陳柏霖，加上有高度優勢，難怪信心滿滿咁話照鏡嗰陣都自覺似金城武。
此外，盂加拉裔嘅46號阿Bi其實係純正香港人，唔擔心外表會惹嚟刻薄留言，仲識做咁話最欣賞游學修捱過負評嘅精神。4號泰妹因為細個畀人笑係人妖而收埋泰國混血兒身份，依家就好自豪，仲有人讚佢似唐寧x關詠荷。而「翻版Hillary」3號Natalie係讀Law㗎，學歷高嘅佢原來係迷妹一名，為咗見Yanny而去面試，最爆笑係細個畀人話似吳君如。
