【Viu】由《試當真》主辦嘅《校花校草2022》今日舉行記者會，21位校花校草齊齊以校服Look示人，青春到爆呀！游學修、蘇致豪同許賢將坊間唔同嘅選秀比賽《香港小姐》、《全民造星》同《就是青春》串連成宣傳標語，認真搞鬼！佢哋話今次係全民投票，已經upgrade server，以免冧機，亦有機制防止再出現買票情況。而9個星期嘅培訓會拍成9集節目，有唔同藝人參與，仲預告有兩位影帝助陣！至於心水冠軍呢，阿修就話唔想皓嵐贏，因為佢拍過試當真啲片，多曝光驚唔公平，但全民投票都話唔埋！
另外，席間宣布試當真成立音樂廠牌Demo Records，仲邀得Tyson Yoshi御用監製Silverstrike助陣，但阿修就話自己幾廿歲人冇打算出歌；而許賢同蘇致豪就話MC $oHo & KidNey依家喺紐約，唔知幾時先返嚟出歌咁話！
