【2022年8月17日】 陳蕾早前推出新歌《下流社會》，當中Heavy metal式嘅嘶叫，令人精神為之一振，fans都話好希望可以喺演唱會中，同佢一齊嗌爆個場呀！呢日佢開live同大家繼續講吓新歌，MC張天賦同洪嘉豪呢對孖寶，中間都加入一齊大放笑料！講講吓就講咗髮型嘅重要性，而MC都話唔同嘅髮型都會影響到演出嘅狀態，陳蕾就特別話MC點整都係一副Bad boy樣，因為戴上耳環後壞男孩嘅味道就出曬嚟。賦豪CP下個月喺九展開3場《Frenemy》演唱會，最近佢哋仲一口氣推出幾首主題曲，當然要乘機宣傳吓，MC之前承諾過開騷會騷肌，佢呢排就真係有密密做gym。除咗同MC，洪嘉豪都希望可以加埋陳蕾開騷，仲喺live度搲贊助添。
