【Viu】5度登紅館舞台嘅Janice衛蘭，噚晚順利完成3場演唱會，尾場邀請到同門師弟MC張天賦擔任嘉賓，一嚟Janice就拎同MC嘅共通點「超市常客」嚟講笑，然後MC再自揭童年陰影，爆為咗聽Janice嘅歌試過收800蚊電話月費單！
騷後Janice舉行慶功宴，指見到fans唔走嗌encore都好感動，希望疫情之後可以開巡迴演出，又自爆keep弗喪食南瓜食到皮膚都變橙色。講到首場騷後網上有兩極反應，Janice表示都有留意到，對網民插爆Sherman鍾舒漫騎劫演唱會變播道會，佢話見到有自責、唔開心，可能只係一時未控制到時間；另外提到有fans反映指想聽多啲中文歌、經典歌，Janice直認之後有改rundown，但坦言原先喺揀歌方面都做到新、舊歌平衡，希望畀fans有新鮮感。至於Sherman亦有受訪回應，解釋係喺rundown上有時間嘅溝通錯誤，事後已經即時修正，但仍深感抱歉。
而尾場嚟睇騷嘅歌手朋友有張繼聰、謝安琪、鄧麗欣、方皓玟、Gin Lee、林奕匡、陳凱詠、Moon、張蔓姿、蔡思韵、鄭融、蘇麗珊同男友等。
